كيفية اعداد سوفليه الموز - حلويات

سهل وسريع على سفرة دايمة

 

سوفليه الموز بطريقة سهلة ولذيذة

النهارده معانا سوفليه الموز بطريقة سهلة ولذيذة، وده بناء على طلب كتير من أصدقائنا، وإنتي كمان لو عايزة تعرفي أي وصفة جديدة ابعتي لنا على "سفرة دايمة"، وإن شاء الله نقدّمها لك في أقرب وقت..

سوفليه الموز

المقادير:

• 2 ثمرة موز
• صفار بيضة
• 3 بياض بيض
• رشة ملح
• ملعقة كبيرة زبدة
• 5 ملعقة كبيرة سكر
• ملعقة كبيرة عصير ليمون

الطريقة:

1- اخلطي الموز مع عصير الليمون، وملعقتين من السكر، وصفار البيض في الخلاط أو بالمضرب الكهربائي كويس أوي لحد ما المكونات تندمج ويبقى الخليط ناعم. 

2- في وعاء استانلس اضربي بياض البيض مع الملح بالمضرب الكهربائي لحد ما حجمه يزيد ويبقى عامل زي الكريمة، وبعدين ضيفي ملعقة سكر، واضربيه مرة كمان لحد ما يبقى الخليط متماسك وناعم. 

3- بعد كده خدي ربع كمية خليط البياض وضيفيه مع خليط الموز وقلّبيهم بهدوء لحد ما يمتزجوا كويس، وبعدين ضيفي باقي الكمية وقلبيهم. 

4- حضّري القوالب اللي هتحطّي فيها السوفليه؛ ادهنيها زبدة، ورشّي فيها سكر في القاع ومن الجوانب، وبعدين صبّي السوفليه في كل قالب، ورصّيهم في صينية فرن. 

5- دخّلي الصينية في الفرن في الرف المتوسط وسيبيها لمدة 15 دقيقة أو لحد ما يبقى لونها دهبي، وقدّميها.. وبالهنا والشفا.