طريقة عمل و صنع تورتة الفواكه مبسطة

((تورتة الفواكه  ...سهله و سريعه و جميله جداً ..( بالصور ) ..من **لؤلؤه**

*****************



السلام عليكم فتوكاتى

كل سنه و إنتوا طيبين

دى تورتة الفواكه ..... سهله أوى ...و سريعه .... و حتطلع حلوه معاكى إن شاء الله

أنا للأسف لم أصور الخطوات بالتفصيل ... لأنى ما كنتش عارفه إنها حتطلع حلوه كده الحمد لله


الكيكه :

ما حبيتش أعملها أسفنجيه ...لأنى بأحب طعم الكيكه اللى بأعملها دى ... بتطلع طعمها أحلى ...و كمان خفيفه مش تقيله

المقادير:

نصف كوب زبد
2 كوب سكر عادى
3 كوب دقيق
4 بيضات كبار
ثلاث أرباع كوب لبن
1 باكو بيكنج باودر
فانيليا
ذرة ملح

الطريقه:
نضع فى الخلاط ( الزبد + البيض+ السكر+ اللبن +فانيليا ) و نضربهم لحد ما يتجانسوا تماما .

فى إناء عميق ننخل الدقيق و نضع البيكنج باودر و ذرة الملح

ثم نضع الخليط الأول على الخليط الثانى و نقلب بالمضرب اليدوى السلك إلى أن يمتزجوا سوياً.

ثم نضع العجين فى صينيه مدهونه ( صينيه كبيره ) و تدخل الفرن على 180 درجه مئويه ... متوسط الحراره

و لا تفتحى الفرن قبل مرور نصف ساعه حتى لا تهبط الكيكه

بتقعد فى الفرن دايماً معايا حوالى 40 دقيقه .

بعد ما تطلع تتركيها تبرد

و تقسميها نصفين

و تسقى كل نصف بماء الكمبوت (( بيعطى طعامه للكيكه و طراوه و جمال خطييييييييير))

و تجهزى الكريمه :

أنا جبت كريمه لبانى و وضعت عليها
قليل من اللبن حوالى نصف كوب ...
و وضعت 5 ملاعق من الكريم شانتيه البودر و 3 ملاعق كبيره سكر...
و ضربتهم بالمضرب الكهربائى حتى حصلت على القوام المطلوب
(( لا تكثرى من الضرب حتى لا ينفصل الدهن عن السائل فى الكريمه ))

ثم تحشى بين الطبقتين بالكريمه و قطع فواكه صغيره مقطعه

ثم تضعى الطبقه الثانيه و تغطيها بالكريمه و تزينيها حسب رغبتك

و بالهنا و الشفا

و أترككم مع الصور

(( هنا التورته كانت لسه فى المطبخ ))


و هنا نقلتها فى طبق التورتات








و هنا بعد ما قطعت منها قطعه و الحمد لله باين إنتظام الطبقات و الحشو












يا رب تعجبكوا